“गद्दार राजदूत”लाई दोस्रो उच्च अलंकार दिइयो भन्दै भारतमा बबाल

सन् १९९८ मा तत्कालीन भारतीय प्रधानमन्त्री अटलबिहारी वाजपेयी नेतृत्वको सरकारले राजस्थानको पोखरण गाउँमा परमाणु परीक्षण गर्दा विश्वका अधिकांश देशले त्यसविरुद्ध बोले । छिमेकी पाकिस्तानले उग्र बिरोध जनायो । तर सबैभन्दा धेरै बिरोध भारतको आफ्नै राजदूतले गरे ।

दक्षिण अफ्रिकाका लागि भारतीय राजदूत लक्ष्मीचन्द जैनले परमाणु परीक्षणको खुलेरै बिरोध गरे । मुलुकको एउटा कर्मचारीको हैसियतमा रहेका राजदूतले परीक्षणको बिरोध मात्र गरेनन् त्यहि बेला दक्षिण अफ्रिकामा भइरहेको डर्बान शिखर सम्मेलनमा भारत बिरोधी एजेण्डाको खुलेर समर्थन गरे ।

त्यसपछि बिजेपी नेतृत्वको सरकारले मुलुकविरोधी राजदूत जैनलाई तत्काल फिर्ता बोलाउन आदेश दियो । तर त्यो आदेशको कुनै परवाह नगरी राजदूत उतै बसिरहे । भारत सरकार बिलखबन्दमा पर्यो । कर्मचारीको हैसियतमा रहेको राजदूतले सरकारको आदेश पालना नगरेपछि बाजपेयी सरकारले कूटनैतिक भाषामा पर्सना नन ग्रेटा घोषणा गर्दा उनी बाध्य भएर स्वदेश फर्कनुपर्यो ।

राजदूत जब स्वदेश फर्किए तब भारतीय राजनीतिमा नयाँ जोडघटाउ शुरु भयो । तर त्यसको खुलासा भर्खरै भएको छ । त्यसरी मुलुकको नीति विपरित परमाणु परीक्षणको बिरोध गरेका राजदूतलाई १३ वर्षपछि सन् २०११ मा भारतीय कांग्रेस नेतृत्वको सरकारले देशकै दोश्रो सर्वोच्च अलंकार पद्य विभूषणले सम्मानित गरिदियो ।

तर त्यस बेलासम्म राजदूतको निधन भइसकेको थियो । सरकारले दिएको उक्त विभुषण उनको परिवारले अस्वीकार गरिदियो । उनीहरूको तर्क थियो, ‘राजदूत राज्यबाट गरिने सम्मानको परम्परागत अवधारणाको विरोधी थिए ।’

सरकारले पद्य विभूषणले सम्मानित गरे पनि उनलाई मृत्युपर्यन्त आजसम्म गध्दारको दाग लागिरहेको छ । तर अहिले तिनै ‘गद्दार’ लक्ष्मी चन्द जैनका पुत्र भारतीय सञ्चारजगतमा चर्चित छन् । सत्तारुढ दल भाजपाको सत्तोसराप गर्ने एनडीटीभीमा कार्यरत श्रीनिवास जैन उनै स्वर्गीय राजदूतका छोरा हुन् ।

उक्त टेलिभिजनमा प्रणय राय,रविशकुमार जस्ता भाजपा र प्रधानमन्त्री मोदीका कट्टर आलोचकहरूसमेत छन् भन्दै स्वयं प्रधानमन्त्री नरेन्द्र मोदीले हाम्रै देशको शैलिमा सात पुस्ते उतारेर पत्रकार श्रीनिवास र उनका स्वर्गीय पिता लक्ष्मीको सार्वजनिक बिरोध गरेका हुन् ।

इतिहासले कहिलेकाही कतिसम्म क्रुर मजाक गर्न सक्छ !