निर्णय ओली सरकारको, अपजस देउवा सरकारको थाप्लोमा

सरकारले हिजोदेखि लामो दूरीका सार्वजनिक सवारीसाधनको भाडादर वृद्धि गरेको सूचना आज बाहिरिएको छ । आज यातायात व्यवस्था विभागले सार्वजनिक गरेको सूचनाअनुसार सरकारले २८ प्रतिशतसम्म भाडा बढाएको छ । तर यो निर्णय यसअघिको ओली सरकारले नै गरे पनि भाडादर वृद्धिको सूचना सार्वजनिक हुँदा शेरबहादुर देउवाको नेतृत्वमा सरकार बनेको छ ।

यसबाट नयाँ सरकारको पहिलो कार्य नै सवारीसाधनको भाडा वृद्धिदर रहेको देखिन गएको हो । ओली सरकारले गरेको निर्णय ढिलो सार्वजनिक हुँदा दोष चाँही हिजो राती गठन भएको नयाँ सरकारलाई परेको बताइन्छ ।यातायात व्यवस्था विभागकाअनुसार नयाँ भाडादर अनुसार यात्रुवाहक सवारीसाधनमा २८, पहाडी बाटोमा सञ्चालन हुने मालवाहक सवारी साधनमा २० तथा तराइको बाटोमा सञ्चालन हुने मालवाहक सवारी साधनमा २६ प्रतिशतसम्म भाडा बढाइएको छ ।

विगतमा सवारी साधनको भाडादर इन्धनको ३५ र अन्य सूचकको आधारमा ६५ प्रतिशतको आधारमा निर्धारण गर्ने गरिएको थियो । यसअघि २०७५ असोज ७ गते बजार हचुवाको भरमा१० प्रतिशत भाडावृद्धि गरी समायोजन गरिएको थियो । आइतबार केपी शर्मा ओलीको नेतृत्वमा रहेको भौतिक पूर्वाधार तथा यातायात मन्त्रालयले मन्त्रीस्तरीय निर्णयबाट भाडा वृद्धि गरेको हो ।

लामो समयदेखि वैज्ञानिक भाडादर लागू हुन नसकेको विभागका प्रवक्ता लोकनाथ भुसालले समेत बताउनुभएको छ ।