माधव नेपाल अराजकहरुको मूली रहेको विष्णु पौडेलको आरोप

आज रुपन्देहीमा कार्यकर्ता भेलालाई सम्बोधन गर्दै एमाले उपमहासचिव विष्णु पौडेलले नेकपा एकीकृत समाजवादीका अध्यक्ष माधवकुमार नेपाललाई अराजकहरुको नेता भन्नुभएको छ । भेलामा नेपालप्रति आक्रामक रुपमा प्रस्तुत हुनुभएका पौडेलले माधव नेपाल विचारविहीन भएको र अराजकहरुको मूली बनेको आरोप लगाउनुभएको छ ।

उपमहासचिव पौडेलले दक्षिणपन्थीको पिछलग्गु भएर वाम एकताको नाटक नगर्न माधव नेपाललाई चेतावनीसमेत दिनुभएको छ । देउवाको चरणमा दल विभाजनको बिन्ती चढाउने माधव नेपालले दक्षिणपन्थीको चाकरी गरेको पौडेलको ठहर छ ।

भेलालाई सम्बोधन गर्ने क्रममा उहाँ माओवादी केन्द्रका अध्यक्ष पुष्पकमल दाहाल प्रचण्ड र माओवादीहरुप्रति आक्रामक देखिनुहुन्थ्यो । उहाँले भन्नुभयो, ‘जसरी पनि सरकारमा जाने दाहाल र नेपालको कुचिन्तनका कारण आजको अवस्था आयो ।’

समसामयिक राजनीतिको विश्लेषण गर्दै उहाँले संसद तत्काल विघटन हुन सक्नेतर्फ संकेत गर्नुभएको छ । देउवा नेतृत्वको सरकारलाई टालाटुली सरकारको संज्ञा दिँदै उहाँले आगामी स्थानीय निर्वाचन र आमनिर्वाचनपछि एमालेको सरकारले सबैलाई विस्थापन गर्ने दाबीसमेत गर्नुभएको छ ।

उहाँले सभामुख अग्निप्रसाद सापपकोटाप्रति पनि कटाक्ष गर्नुभएको छ । सापकोटा समग्र सदनको नेता नभएर माओवादीको नेता बनेको एमाले उपमहासचिवले भन्नुभयो । ‘सभामुखको नालायकीका कारण देश बजेटविहीन बन्यो,’ उहाँको निश्कर्ष छ ।

सोही कार्यक्रममा बोल्दै सचिव प्रदीप ज्ञवालीले माधवकुमार नेपाल दलालहरुको दलदलमा फसेको आरोप लगाउनुभएको छ ।

त्यसैगरी स्थायी समिति सदस्य टोपबहादुर रायमाझीले अहिलेको सरकारलाई सीमापार र समुद्रपारको डिजाइनमा परमादेशबाट बनेको संज्ञा दिनुभएको छ । उहाँले भन्नुभयो, ‘माओवादी अध्यक्ष प्रचण्ड र माधव नेपाल शेरबहादुर देउवाको पुच्छर भए ।’ देउवाको पुच्छर भएकाले अब प्रचण्डले झिँगा पनि धपाउन नसक्ने उहाँको ठहर छ ।