गुडिरहेको रेलमा आगो झोसियो, चक्कु प्रहारबाट १७ घाइते

जापानको राजधानी टोक्योमा रेलभित्र एक जना यात्रुले गरेको चक्कु प्रहारबाट १७ जना घाइते भएका छन् । प्रहरीका अनुसार कम्तिमा दुई जनाको हत्या गर्ने उद्देश्यले २४ वर्षे ठिटोले ती सबैलाई चक्कु हानेको प्रारम्भिक अनुसन्धानबाट खुलेको छ ।

यात्रुहरुलाई जथाभावी चक्कु प्रहार गरेपछि ती युवकले गुडिरहेको रेलमा आगो झोसेका थिए । पहिले यात्रुहरुमाथि चक्कु प्रहार गरेका उनले प्रहरीले पक्रने बेलामा साथमा भएको लाइटर बालेर रेलमा आगो लगाउने प्रयास गरेका थिए ।

चक्कु प्रहारबाट घाइतेमध्ये ७० वर्षका एक जना वृद्धको अवस्था चिन्ताजनक रहेको बताइएको छ । जापानमा सामान्तयाः यस्ता अपराधको घटना विश्वको तुलनामा कम हुने गर्छ ।तर, पछिल्ला केही वर्षमा जापानी समाज पनि गम्भीर खालका अपराधमा अगाडि बढेको देखिएको छ । यसअघि सन् २०१९ र २०१६ मा पनि रेलमा भएका यस्तै प्रकृतिका घटनामा केहीको ज्यान गएको थियो ।

सन् २००८ मा राजधानी टोक्योमा मानिसहरुको भीड भएको स्थानमा एक जना चालकले जथाभावी गाडी कुदाउँदा सात जनाको ज्यान गएको थियो ।