महामारीमा फर्केकाले परराष्ट्रमन्त्रीलाई बुझाए ज्ञापनपत्र

कोरोना महामारीका कारण चीनलगायत विभिन्न मुलुकबाट पढाई छाडेर बीचैमा स्वदेश फर्किएका विद्यार्थीहरुलाई पुनः सम्बन्धित देशमा पठाउने वातावरण मिलाउन संयुक्त विद्यार्थी संगठनले सरकारको ध्यानाकर्षण गराएको छ ।

सात विद्यार्थी संगठनले आज परराष्ट्रमन्त्री डा. नारायण खड्कालाई ज्ञापनपत्र बुझाउँदै सयौँको संख्यामा अड्किएका त्यस्ता विद्यार्थीलाई तत् तत् देशमा फर्काउने वातावरणका लागि कूटनीतिक पहल लिन आग्रह गरेको हो ।

ज्ञापनपत्रमा विद्यार्थीहरु त्यसरी अड्किँदा नेपाली अभिभावकहरुको करोडौं लगानी र विद्यार्थीहरुको सपना चकनाचुर हुने अवस्था आएको भन्दै चीनलगायत अन्य देशका सरकारसँग कूटनीतिक पहलमार्फत तत्काल फर्किने वातावरण मिलाउन अनुरोध गरिएको छ ।

पीएचडी, एमडी/एमएस, एमडीएस, एमबीबीएस, इञ्जिनियरिङ तथा एमबीएलगायतका कोष अध्ययनको क्रमलाई बीचमा छाडेर फर्किएका विद्यार्थीहरु लामो समयदेखि नेपालमै बस्न बाध्य भएको भन्दै ज्ञापनपत्रमा उनीहरुलाई पुनः चीनलगायतका देशमा जाने वातावरण बनाइदिन आग्रह गरिएको छ ।

संयुक्त विद्यार्थी संगठनले अनलाइन माध्यमबाट अध्ययन गर्न सम्भव नहुने र त्यस्तो योग्यताको प्रमाणपत्रलाई नेपालमा मेडिकल काउन्सिल र इञ्जिनियरिङ काउन्सिलले समेत मान्यता नदिने भएकाले नेपाली अभिभावकको करोडौँ लगानी खेर जाने अवस्था बनेकोमा चिन्तासमेत जनाएको छ ।

काँग्रेसनिकट नेविसंघ, माओवादी केन्द्रको अखिल (क्रान्तिकारी), एकीकृत समाजवादी सम्बद्ध अनेरास्ववियु, जसपानिकट समाजवादी विद्यार्थी युनियन, जनमोर्चानिकट अखिल छैठौं, विप्लव नेतृत्वको नेकपा सम्बद्ध अखिल (क्रान्तिकारी) र मोहन वैद्य नेतृत्वको क्रान्तिकारी माओवादीको अखिल क्रान्तिकारीले आज परराष्ट्र मन्त्रालय पुगेर ज्ञापनपत्र बुझाएका हुन् ।