नेपाली काँग्रेसको महाधिवेशनमा गाडी भारतीय,मतपेटिका पानी ट्याङ्की

नेपाली काँग्रेसको राजधानीमा जारी १४ औं महाधिवेशनमा नेता तथा कार्यकर्ताले मज्जैले भारतीय नम्बर प्लेटका गाडी कुदाएका छन् । भारतको पश्चिम बंगाल,बिहार र उत्तर प्रदेश राज्यको नम्बर प्लेटका जीपहरु बग्रेल्ती गुडाइएका छन् ।

कतिपय भारतीय सवारी साधनमा केन्द्रीय समितिमा उठेका उम्मेदवारको ब्यानरसमेत झुण्डाइएको देखिन्छ । भृकुटीमण्डपभित्र लाइनमा राखिएका भारतीय नम्बर प्लेटका सवारी साधनले भारतीय काँग्रेसको अधिवेशनको झझल्को दिएको भन्दै एकथरी महाधिवेशन प्रतिनिधिले खासखुस गरेका छन् ।

“नाङ्लोभन्दा ठूलो मतपत्र हुने भएपछि काँग्रेसले ७५ थान पानी ट्याङ्कीको जोहो गरेको छ ।”

यता, केन्द्रीय समितिका सभापतिसहित १ सय ३४ सिटको निम्ति ५ सय ४८ जनाको उम्मेदवारी परेको छ । पर्सि हुने मतदानको निम्ति सम्भवतः विश्वकै लामो र ठूलो मतपत्र हुनसक्ने काँग्रेस निर्वाचन समितिका सदस्यहरुले आकलन गरेका छन् ।

भद्दा मतपत्रका कारण एक जना मतदातालाई मतदान गर्न कम्तिमा पनि ५० मीनेट लाग्ने छ । ४७ सय जना प्रतिनिधिलाई पर्सि दिनभरको समयले पनि मतदान गर्न नपुग्ने आशंका गरिएको छ । मतदान केन्द्र तीन स्थानमा तोकिएको छ ।

महाधिवेशन भइरहेको भृकुटीमण्डप, नजिकैको राष्ट्रिय सभागृह र नेपाल पुलिस क्लबलाई मतदान केन्द्र बनाइएको छ । नाङ्लोभन्दा ठूलो मतपत्र हुने भएपछि काँग्रेसले ७५ थान पानी ट्याङ्कीको जोहो गरेको छ । त्यो खानेपानीको निम्ति नभई ‘ब्यालेट बक्स’ को लागि हो । खानेपानीको रुपमा महाधिवेशनमा पतञ्जली नेपालले दिव्यजल उपलब्ध गराएको छ ।