रावतको अन्त्येष्टिमा १७ तोपको सलामी

गत बुधबार दक्षिण भारतको तमिलनाडुमा भएको हेलिकोप्टर दुर्घटनामा मारिएका भारतका प्रथम चिफ अफ डिफेन्स स्टाफ (सीडीएस) जनरल विपिन रावतको सैनिक सम्मानका साथ अन्त्येष्टि गरिएको छ । १७ तोपको सलामीसहित उनको नयाँ दिल्लीमा अन्त्येष्टि गरिएको हो । रावत र दुर्घटनामा मारिएकी श्रीमती मधुलिकाको शवयात्रा सँगै गरिएको थियो ।

उनलाई १७ तोपको सलामी दिइएको तर २१ तोपको सलामी नदिइएको सम्बन्धमा विभिन्न चर्चा भएको छ । तर भारतीय सैन्यस्रोतले २१ तोपको सलामी राष्ट्रपति तथा वरिष्ठ नेताको निधनमा मात्रै दिइने प्रचलन रहेको प्रष्ट पारेको छ ।

तीबाहेक तीन वटै सेनाका प्रमुखको निधनमा भने १७ तोपको सलामी दिने प्रचलन छ । १९ तोपको सलामी भने भारतीय राष्ट्राध्यक्ष वा सरकार प्रमुख विदेश भ्रमणमा जाँदा र विदेशी राष्ट्राध्यक्ष वा सरकार प्रमुख भारत भ्रमणमा आउँदा दिइने गरिएको छ ।

यता उत्तर प्रदेशका मुख्यमन्त्री योगी आदित्यनाथले हेलिकोप्टर दुर्घटनामा मारिएका सेनाका विंग कमाण्डर पृथ्वीसिंह चौहानको परिवारसँग भेट गरेका छन् । उनले कमाण्डरको परिवारलाई राज्य सरकारले ५० लाख रुपैयाँ र परिवारका सदस्यलाई रोजगारीको वचन दिएका हुन् ।

मुख्यमन्त्रीले मृतक चौहानको आगरामा राजकीय सम्मानका साथ अन्त्येष्टि गरिने जानकारी गराएको बताइएको छ ।

https://www.youtube.com/watch?v=4U0ynBqAV10