बालाजुमा पार्किङमा राखेको गाडी आफैँ गुड्यो, च्यापिएर ड्राइभरको मृत्यु

बालाजु औद्योगिक क्षेत्रभित्र पार्किङ गरेर राखेको ग्याँस बुलेट अचानक गुड्दा चालकको ज्यान गएको छ । आज बिहान पौने चार बजे औद्योगिक क्षेत्रभित्र पार्किङ गरेर सिसा पुछ्दै गर्दा बुलेट एकाएक गुडेर अर्को ग्यास बुलेटमा ठोकिंदा चालकको च्यापिएर मृत्यु भएको हो ।

मृत्यु हुनेमा भारतको कलकत्ता घर भएका ४५ वर्षीय दिलिप राजवंशी रहेको महानगरीय प्रहरी वृत्त बालाजुले जानकारी दिएको छ । बुलेटले च्याप्दा गम्भीर घाइते भएका राजवंशीको त्रिवि शिक्षण अस्पताल महाराजगंजमा उपचारको क्रममा मृत्यु भएको हो ।

प्रहरीका अनुसार औद्योगिक क्षेत्रमा दुई वटा ग्यास बुलेट पार्किङमा थिए । भारतीय नम्बर एनएलओ २ क्यु ३७२० र एनएलओ २ क्यु ३७२९ बुलेटको बीचमा राजबंशी च्यापिएका थिए । अर्को बुलेट चालक एमडी मुखीलाई प्रहरीले नियन्त्रणमा लिएर थप अनुसन्धान थालेको छ ।