घाँटी जँचाउन गएका आइजीपी सुरक्षा घेरासहित दिल्लीको सपिङ मलमा

घाँटीको उपचार गराउन भन्दै गत हप्ता नयाँ दिल्ली पुगेका सशस्त्र प्रहरी बलका आइजीपी शैलेन्द्र खनाल यतिखेर किनमेलमा व्यस्त देखिएका छन् । उनी हतियारधारी भारतीय सीमा सुरक्षा बल (SSB) को घेरामा राजधानीको व्यस्त र महँगो सपिङ एरियामा पुगेका हुन् ।

नयाँ दिल्लीको कनाट प्लेसमा खनाल सशस्त्र प्रहरीको झण्डा र तीन तारे प्लेट हालिएको डिएल १२ सीके ७५४४ नम्बरको सेतो गाडीमा पुगेका थिए । उपचार गराउन गएका बिरामी चिटिक्क परेर अस्पतालभन्दा बाहिरै बजारतिर भेटिएपछि बाराखम्बा रोडस्थित नेपाली दूतावासका कूटनीतिज्ञहरु दङ्ग परेका छन् । उनले दिल्लीमा घुमघाम गर्दा मुखमा मास्कसमेत लगाएका छैनन् ।

“नयाँ दिल्लीको कनाट प्लेसमा खनाल सशस्त्र प्रहरीको झण्डा हालिएको डिएल १२ सीके७५४४ नम्बरको सेतो गाडीमा पुगेका थिए ।”

गत आइतबार दिउँसो साढे तीन बजेको उडानबाट उनी त्यसतर्फ गएका हुन् । गृह मन्त्रालयका हाकिमहरूले खनाल साँच्चैको बिरामी भएर गएका हुन् कि २६ गते एमसिसी पेश हुँदाको अवस्थामा उत्पन्न हुनसक्ने उपद्रबलाई छल्ने बहानामात्रै पारेका हुन् भन्ने आशंका आइतबार नै गरेका थिए ।उनी बिरामी नै हुन् र अपरेशनसम्मको सम्भावना हो भने परिवारका सदस्य पनि साथ लैजानुपर्ने आकलन गरिएको थियो । तर परिवार काठमाडौंमै छन् । उनीसँग सशस्त्रका जनरल फिजिसियन डिएसपी रोशन झा मात्र गएका छन् ।

यसअघि प्रधानसेनापति प्रभुराम शर्मा घाँटीको थाइराइड बढेपछि उत्पन्न पत्थरीको उपचार गराउन परिवारसहित दिल्ली गएका थिए । उनले गुरुग्रामको मेदान्त अस्पतालमा उपचार गराएका हुन् ।एक हप्ताको छुट्टी मिलाएर भारत उडेका खनालले अस्पताल पुगेको देखाउन स्थानीय म्याक्स अस्पतालको भुईंतल्लामा उभिएर एउटा फोटो भने खिचेका छन् ।