बालुवाटारमा अहिले निर्णायक बैठक,बानेश्वरमा अझै अलमल

अमेरिकी सहयोग परियोजना मिलेनियम च्यालेञ्ज कर्पोरेशन (एमसीसी) सम्झौतामा सहमति जुटाउन सत्ता गठबन्धनको निर्णायक बैठक अहिले केहीबेर पछि बालुवाटारमा बस्दैछ । प्रधानमन्त्रीको सरकारी निवासमा बिहान १० बजे बोलाइएको बैठकले दिउँसो १ बजे डाकिएको प्रतिनिधिसभा बैठकको कार्यसूचीबारे टुंगो लगाउने छ ।

हिजो बस्ने भनिएको सत्ता गठबन्धनको निर्णायक बैठक नेकपा एकीकृत समाजवादीको स्थायी समिति बैठकका कारण आजलाई सारिएको हो । आजको संसद बैठकअघि नै एमसीसीबारे गठबन्धन दलहरुबीच सहमति जुटाउने प्रयासस्वरुप बैठक बस्न लागेको बालुवाटार स्रोतले बताएको छ ।

एकीकृत समाजवादीको हिजोको बैठकले एमसीसी सम्झौता संसदमा टेबल भए पनि त्यसको पक्षमा मतदान नगर्ने निर्णय गरेको छ । तर माओवादी केन्द्रले भने यथास्थितिमा एमसीसी अनुमोदन भए सरकारबाटै बाहिरिने निर्णय यसअघि नै गरिसकेको छ । आन्तरिक र वाह्य परिस्थितिलाई नियाल्दै आएको माओवादीले आफ्नो पछिल्लो निर्णयमा लचिलो हुने संकेत देखाएको छ ।

आज डाकिएको संसद बैठकको सम्भावित कार्यसूचीमा एमसीसी एजेण्डा छैन । तर संसद बैठकअघि बस्ने कार्यव्यवस्था परामर्श समितिको बैठकले कार्यसूची तय गर्ने छ ।

यता प्रमुख विपक्षी दल नेकपा एमालेले भने संसद बैठकमा गर्दै आएको अवरोधलाई आज पनि कायम राख्ने जनाएको छ ।