सोत्तर पार्दै समिट एअर

दुर्गमका यात्रुलाई हवाई सेवा दिन एक वर्ष अघिदेखि सुदूरपश्चिममा उडान थालेको निजी क्षेत्रको विमान कम्पनी समिट एयरले मनपरी भाडा तोकेर लुट मच्चाउन थालेको छ ।

नेपाल नागरिक उड्डयन प्राधिकरणसँग सम्झौता गरेको भाडादर एक वर्षमै २२ प्रतिशतभन्दा बढी वृद्धि गरेको छ । कात्तिकमा बाढी र पहिरोले सुदूरपश्चिमका पहाडी जिल्ला क्षतविक्षत भएर यातायात अवरुद्ध भएको बेला समिटले पहिलो पटक ११ प्रतिशत भाडा वृद्धि गरेको थियो । बाजुरा, अछाम, दाचुला, बैतडी र बझाङमा एकल उडान गर्दै आएको यो कम्पनीले सम्झौताविपरीत दोस्रो पटक पुसमा १८ प्रतिशत र फागुनमा २२ प्रतिशतले भाडा वृद्धि गरेको छ ।

बेमौसमी बाढी र पहिरोको विपद्मा परेका बेला समिट एयरका कर्मचारीले बझाङमा टिकटको कालोबजारीसमेत गरेका थिए । उनीहरूले चार हजार आठ सय रुपैयाँ पर्ने टिकटलाई १५ हजार रुपैयाँसम्ममा बिक्री गरेको स्रोतले बतायो ।

त्यही बेला समिटको जहाजमा सिकिस्त बिरामीलाई टिकट नदिएका कारण एक जना बालकको मृत्युसमेत भएको थियो ।

नेपाल नागरिक उड्डयन प्राधिकरणले जारी गरेको हवाई भाडा नियमन निर्देशिका २०७३ समेत उल्लंघन गरेर समिटले मनोमानी भाडा वृद्धि गर्दा पनि यसलाई नियमन गर्न कसैले चासो दिएको छैन । निर्देशिकाको दफा ५ मा वायुसेवा कम्पनीले निर्धारित हवाई भाडादरभन्दा बढी असुलउपर गर्नु गराउन नहुने उल्लेख छ ।