मिर्गौला फेल भएका माओवादी कमाण्डरको याचना

दुवै मिर्गौला फेल भएपछि काठमाडौंस्थित त्रिभुवन विश्वविद्यालय शिक्षण अस्पतालमा भर्ना भएका पूर्वजनमुक्ति सेनाका कम्पनी कमाण्डर जीतबहादुर महरा (महाविर) ले उपचारका लागि सरकार र सहयोगीहरुसँग याचना गरेका छन् । मोरङको मिक्लाजुङ गाउँपालिका ८ का ४२ वर्षीय महराले दुवै मिर्गौला फेल भएपछि केही वर्षदेखि आफ्नै खर्चमा डायलासिस गराउँदै आएका थिए । डायलासिस गराउँदा सबै जायजेथा सकिएको र चिकित्सकले एउटा मिर्गौला प्रत्यारोपण गराउँदा जिउन सकिने सल्लाह दिएकाले आफूले सरकार र दाताहरुसँग हात फैलाउनुपरेको उनी बताउँछन् ।

दलित समुदायबाट प्रतिनिधित्व गर्दै २०५५ सालदेखि माओवादी जनयुद्धमा पूर्णकालीन कार्यकर्ता महरा तत्कालीन पूर्वजनमुक्ति सेना फर्स्ट डिभिजनअन्तर्गत १८ औं बटालियनको कम्पनी कमाण्डर थिए । शान्ति प्रक्रियापछि माओवादी पार्टीले विराटनगरबाट प्रकाशन गर्ने जनविद्रोह दैनिकमा केही वर्ष रिपोर्टरका रुपमा काम पनि गरे । महराका श्रीमतीसहित एक छोरा र एक छोरी छन् । माओवादी पार्टी विभाजनपछि हाल नेपाल कम्युनिष्ट पार्टीको ब्युरो सदस्य र श्रमिक संघ मुक्ति मोर्चाको केन्द्रीय उपाध्यक्ष छन् । ‘उपचार गर्दा आफूसँग भएको १५ लाख सबै सकियो । डाक्टरले मिर्गौला प्रत्यारोपण गर्न २० लाख लाग्छ भनेका छन् । त्यसैले सहयोगका लागियाचना गर्न बाध्य भएको हुँ…

अस्पतालको शैयाबाट महावीरले भनेका छन् । उनले आफूलाई ९८४४४२३९९५ मा सोझै सम्पर्क गरेर वा प्राइम बैंकमा रहेको खाता नम्बर ‘०४२०००१०जीएल’ मा सक्दो रकम जम्मा गरेर सहयोग गरिदिन दयालु दाताहरुलाई आग्रह गरेका छन् ।