माधव नेपालको पद खुस्काउन ओलीले हालेको मुद्धा पूर्ण सुनुवाइमा जाने

सर्वोच्च अदालतले नेकपा एकीकृत समाजवादीका १४ जना सांसदविरुद्ध एमाले अध्यक्ष केपी ओलीले दायर गरेको रिट पूर्ण सुनुवाइमा पठाउन आदेश दिएको छ । न्यायाधीशद्वय ईश्वरप्रसाद खतिवडा र कुमार चुडालको इजलासले रिटलाई पूर्ण सुनुवाइमा लैजाने निर्णय गरेको हो ।

मुद्दाको पक्ष र विपक्ष दुवैतर्फबाट लिखित जवाफ पेश भएको र अन्य मुद्दाको अङ्ग पुगेकाले फैसला केन्द्रित सुनुवाइका लागि पेसी तोक्न पूर्ण सुनुवाईमा लैजान इजलासले आदेश गरेको हो ।

ओलीले नेपालसहित तत्कालीन एमालेका १४ जना सांसदमाथि गरिएको कारवाहीको सूचना सभामुखले नटाँसेको र उनीहरुले सांसदकै हैसियतमा एकीकृत समाजवादी दल दर्ता गरेको भन्दै त्यसविरुद्ध रिट हाल्नुभएको थियो । ओलीले अन्तरिम आदेशमार्फत १४ भाइको पद खुस्काउन र एकीकृत समाजवादीलाई वैधानिकता नदिन माग गरे पनि मुद्धाको पेशी पटक-पटक सर्दै आएको छ ।