सातदोबोटो–चापागाउँ सडक बन्द, थलीमा सडक अवरुद्ध

ललितपुरको सातदोबोटो–चापागाउँ सडकखण्ड आज पनि बिहान ११ बजेदेखी अपरान्ह ४ बजेसम्म बन्द गरिएको छ । सडक मर्मतको माग राख्दै स्थानीयले हिजोदेखि उक्त सडक अवरुद्ध गर्दै आएका छन् ।

सातदोबाटो–चापागाउँ चल्ने सवारी साधनलाई धापाखेल–सुमेरु अस्पताल–सातदोबाटो हुँदै आउने जाने व्यवस्था मिलाइएको महानगरीय ट्राफिक प्रहरी महाशाखाले जनाएको छ ।

यता काठमाडौंको थली हुँदै चल्ने सवारी साधन पनि प्रभावित भएका छन् । स्थानीयले सडक मर्मतको माग राख्दै थलीको मिलनचोकमा सडक अवरुद्ध गर्दा सवारी आवागमन प्रभावित भएको प्रहरीले जनाएको छ ।

थली सडकखण्डमा सञ्चालन हुने सबै सवारी साधनलाई जोरपाटी–सुन्दरीजल हुँदै आउने–जाने व्यवस्था मिलाइएको छ ।