कार दुर्घटनामा एकको मृत्यु,चार घाइते

मदन भण्डारी राजमार्गको उदयपुरगढीस्थित दनुवारबेशीमा हिजो राती कार दुर्घटना हुँदा एक जनाको मृत्यु भएको छ भने चार जना घाइते भएका छन् । मृत्यु हुने मोरङ बिराटनगर ५ चाँदनी चौकका ३४ वर्षीय डेभिड भनिने देवेन्द्र चापागाइँ हुन् । घाइते हुनेहरु सोही स्थानका ३१ वर्षीय विशाल राय र २३ वर्षीय सुजन खतिवडा, २७ वर्षीय सागर घिमिरे र ३५ वर्षीय सुरज पौडेल रहेका छन् । दुर्घटनाग्रस्त कार बीरगञ्जबाट बिराटनगरतर्फ आइरहेको थियो । बा २५ च ७८१९ नम्बरको सो कार बैजनाथ खोलामा रहेको पक्की पुल नजिकै सडकबाट करिब १५ मीटर तल खसेको थियो ।

दुर्घटना भएको थाह पाउनेबित्तिक्कै गाउँले र प्रहरीहरुले उनीहरुलाई उध्दार गरेका थिए । मृतक चापागाइँको उदयपुर अस्पताल ल्याई पुर्याउँदा मृत्यु भएको हो । अन्य घाइते सबैलाई थप उपचारको निम्ति न्यूरो अस्पताल विराटनगर पठाइएको प्रहरीले जनाएको छ । मृतकको शव उदयपुर अस्पतालको शव गृहमा राखिएको छ भने आवश्यक कानूनी प्रकृयापछि आफन्तलाई बुझाउने तयारी भइरहेको उदयपुर प्रहरीका प्रवक्ता सन्तोष आचार्यले बताए ।