कमल पोखरीको प्रशिक्षण सकेर राजेन्द्र महतो माइतीघर जाने

लोकतान्त्रिक समाजवादी पार्टी छोडेर आफ्नो नेतृत्वमा छुट्टै अभियान घोषणा गरेका मधेसी नेता राजेन्द्र महतोले आजदेखि सडक संघर्ष शुरु गर्ने भएका छन् । 

महन्थ ठाकुरले पार्टीमा एकलौटी गरेको आरोप लगाउँदै यसैसाता लोसपा परित्याग गरी 'राष्ट्रिय मुक्ति क्रान्ति अभियान' घोषणा गरेका उनले आज माइतीघरमा प्रदर्शन गर्न लागेका हुन् । ०६४ फागुन १६ गते तत्कालीन सरकार र मधेसी मोर्चाबीच भएको आठ बुँदे सम्झौता कार्यान्वयन गराउन दबाब दिने उद्धेश्यले निषेधित क्षेत्र तोड्दै प्रदर्शन गर्ने महतोको तयारी छ । 

अभियान घोषणालगत्तै आन्दोलनको तयारीमा जुटेको महतोको टोलीले देशभरका कार्यकर्तालाई बोलाएर प्रशिक्षण चलाइरहेको छ । अहिले कमल पोखरीस्थित महेश्वरी भवनमा प्रशिक्षण चलिरहेको र दिउँसो सवा १ बजे माइतीघरमा प्रदर्शन गर्ने बुझिएको छ ।