एकाबिहानै दुर्घटना, न मान्छे चिनिन्छ न त गाडी नै !

मकवानपुरको मनहरी गाउँपालिका ६ मा एकाबिहानै विभत्स घटना भएको छ । स्थानीय बासिन्दाले सडकमा मान्छेको विभत्स लास देखेपछि प्रहरीलाई खबर गरेका थिए । इलाका प्रहरी कार्यालय मनहरीका अनुसार मृतकको टाउको फुटेर छरपस्ट भएको छ ।

गएराति ९ बजेतिर एउटा १२ चक्के ट्रक आएर सडक किनारमा बास बसेको थियो । मृतक व्यक्ति पनि सोही स्थान वरपर घुमिरहेका थिए । बिहान एकाएक शव भेटिएपछि सोही ट्रकले किचेर ती ब्यक्तिको ज्यान गएको अनुमान गरिएको छ । ‘ज्यानमा पूरै टायर चढेको जस्तो देखिन्छ’, प्रहरी निरीक्षक प्रकाश थापाले भने–‘ट्रक र मृतक दुबैको पहिचान भएको छैन ।’ ती ब्यक्ति गाडीमुनि सुतेको र गाडीमुनि सुतेकोबारे ट्रक चालकलाई जानकारी नहुँदा किचिएको हुन सक्ने अनुमान गरिएको प्रहरी निरीक्षक थापाले बताए ।

मृतकको हुलिया सम्बन्धित क्षेत्रहरुमा पठाइएको र सिसि क्यामेराको सहायतामा चितवनको प्रहरीसँग समेत समन्वय गरी ट्रकको खोजी कार्य जारी राखिएको इलाका प्रहरी कार्यालय मनहरीले जनाएको छ ।