ललितपुरमा १३ सय २७ वटा इण्डक्सन बाँडिएन

ललितपुर महानगरपालिकाको वडा नम्बर २ कार्यालयले विद्युतीय चुल्हो (इण्डक्सन) वितरण कार्यक्रम स्थगित गरेको छ । आजका लागि तय भएको कार्यक्रम अन्तिम समयमा स्थगित गरिएको हो । वडा कार्यालयले सूचना जारी गर्दै इण्डक्सन चुल्हो वितरण कार्यक्रम स्थगित भएको जानकारी गराएको हो ।

‘वडा नम्बर २ को कार्यालयबाट २०७९ असार २२ मा इण्डक्सन चुल्हो वितरण गरिने कार्यक्रम जानकारी सूचना गरिएकोमा प्राविधिक कारणले अर्को सूचना प्रकाशित नभएसम्म हाललाई स्थगित गरिएको छ’, सूचनामा भनिएको छ ।

सबै तयारी पूरा भइसके पनि प्राविधिक कारणले कार्यक्रम स्थगित गर्नुपरेको वडाध्यक्ष राजेशकुमार महर्जनले बताए । उनकाअनुसार अबको एक दुई दिनमा कार्यक्रम राखिनेछ । वडाभित्रका एक हजार ३२७ जनालाई विद्युतीय चुल्हो वितरण गर्न लागिएको थियो ।