नागरिकता विधेयकमाथि आज मध्यान्ह १२ बजे छलफल

हिजो राष्ट्रिय सभाको बैठकले विधायन व्यवस्थापन समितिमा छलफलको लागि पठाएको नागरिकता विधेयकमाथि समितिले आजदेखि दफावार छलफल गर्ने भएको छ । मध्यान्ह १२ बजे बस्ने गरी बोलाइएको समिति बैठकमा छलफलको निम्ति गृहमन्त्री र गृह तथा कानुन,न्याय तथा संसदीय मामिला मन्त्रालयका सचिवहरूलाई छलफलका लागि बोलाइएको छ ।

राष्ट्रपति विद्यादेवी भण्डारीले पुनर्विचारका लागि १५ बुँदे सुझावसहित फिर्ता पठाउनुभएको विधेयकमाथि छलफलका गर्न विधायन समितिको बैठक तय गरिएको हो । समितिले एक दिनले नपुगे केही दिन लगाएर छलफल गर्ने तर अड्काएर नराख्ने तयारी गरेको स्रोतको दाबी छ ।

नागरिकता विधेयक यसअघि प्रतिनिधिसभाको बैठकले मतदानको प्रक्रियाबाट बहुमतको आधारमा हुबहु पारित गरी सकेको छ । राष्ट्रियसभाबाट पारित हुनासाथ पुनः प्रमाणीकरणको निम्ति राष्ट्रपतिसमक्ष सिफारिस गर्ने सरकारको तयारी छ ।