नेपालले टी–२० सिरिजको अन्तिम तथा फाइनल खेल खेल्दै

केन्या भ्रमणमा रहेको नेपालको क्रिकेट टोलीले आज टी–२० सिरिजको अन्तिम तथा फाइनल खेल केन्यासँग खेल्दै छ । हिजो भएको चौथो खेलमा नेपाललाई पराजित गर्दै केन्याले सिरिज २–२ को बराबर गरेको थियो ।

टी–२० अन्तर्राष्ट्रिय क्रिकेट सिरिजको पाँचौँ तथा अन्तिम खेलमा नेपाल जित निकाल्दै शृङ्खला आफ्नो पक्षमा पार्ने योजनामा छ । खेल दिउँसो पौने ४ बजे नैरोबीको खेल मैदानमा सुरु हुने छ ।

हिजोको चौथो खेलमा नेपाल केन्यासँग सात रनले पराजित हुन पुग्यो । १ सय २ रनको सामान्य लक्ष्य पाएको नेपालले निर्धारित २० ओभरमा ९ विकेट गुमाउँदै ९४ रन मात्रै बनाएको थियो । खराब सुरुवात गरेको नेपालले आठ जना ब्याट्सम्यानले दोहोरो अंक नै जोड्न सकेनन् भने रोहितकुमार पौडेलले सर्वाधिक ४७ रन बनाएका थिए ।

पहिलो खेल नेपालले केन्यालाई पाँच विकेटले पराजित गरेको थियो । दोस्रो खेलमा नेपाल १८ रनले पराजित भएको थियो भने तेस्रो खेलमा नेपालले केन्यालाई चार विकेटले पराजित गरेको थियो ।

अब नेपालले केन्यासँग तीन खेलको एक दिवसीय सिरिज खेल्नेछ । नेपालले पहिलो खेल भदौ १७, दोस्रो १८ र अन्तिम खेल २० गते खेल्ने तालिका छ ।