सिट बाँडफाँटको किचलो,बिहान कार्यदल बस्ने,साँझ शीर्ष नेतृत्वले कम्मर कस्ने

सत्ता गठबन्धन दलले निर्माण गरेको सिट बाँडफाँट कार्यदलको बैठक आज पनि बस्दै छ। बिहानको बैठकले विस्तृत प्रतिवेदन तयार गर्ने छ भने साँझ ५ बजे बस्ने शीर्ष नेतृत्वको बैठकले त्यसबारे छलफल गर्ने र सकभर कुरा मिलाउने बताइएको छ ।

११ सदस्यीय कार्यदलले पुनः विस्तृत प्रतिवेदन र मापदण्डको बारेमा गृहकार्य गर्न समय पाएपछि आज बैठक बस्न लागेको हो । कार्यदलको बैठकले तयार पारेको विस्तृत प्रतिवेदनको आधारमा आजै सिट बाँडफाँटको टुङ्गो लगाउने तयारी रहेको बुझिएको छ।

यता गठबन्धनमा रहेका सबै दलहरू आन्तरिक छलफलमा जुटेका छन् । नेपाली काँग्रेसले १०० सिटको दाबीमा टसमस नगरेपछि अन्य दलहरू सकसमा देखिन्छन् । प्रतिनिधि सभा सदस्यको १ सय ६५ सिटका लागि गठबन्धन दलबाट २ सय २७ सिटको दाबी परेसङ्गै अन्योल सृजना भएको छ।

प्रतिनिधिसभाका १ सय ६५ तथा प्रदेश सभाका ३ सय ३० सिटका लागि सत्तारुढ दलवीच बाँडफाँटको प्रयास भइरहे पनि तीन साता नाघिसक्दा समेत निष्कर्षमा पुग्न सकेको छैन ।