गुट अर्कै पर्दा फेरियो कोठा, बसेनन् कुर्सीमा

आफ्नै पार्टीका पूर्वमेयर भीम पराजुलीमाथि दोष खन्याउँदै विराटनगर महानगरपालिकाका वर्तमान मेयर नागेश कोइरालाले सयदिने श्वेतपत्र जारी गरेका छन् । जेठ ९ गते पदभार ग्रहण गरेका कोइरालाले सय दिनमा उल्लेख्य काम गर्न नसक्नुको सबै दोष पूर्वमेयर र उनको टोलीमा रहेका जनप्रतिनिधिलाई दिएका छन् । विराटनगर महानगरको पहिलो कार्यकाल हाल कांग्रेस केन्द्रीय सदस्य रहेका भीम पराजुलीले बहुमतसहित नेतृत्व गरेका थिए । पूर्वमेयर पराजुली देउवा समूहमा छन् । पराजुलीचाहिँ शेखर कोइराला पक्षधर हुन् ।

पराजुलीले महानगरमा नियम मिचेर कर्मचारी भर्ना गर्दा ६ सय ९ जनाको जम्बो टोली भएकाले तलब खुवाउन धौधौ पर्ने गरेको र बेरुजु बढेको छ । तर, कर्मचारीको लस्कर भए पनि अझै महानगरलाई दक्ष कर्मचारी अभाव छ । महानगरको ऐलानी जग्गा जथाभावी बाँड्दा सार्वजनिक तथा खुला स्थान, पार्क र उद्यानका लागि स्थान अभाव भएको मेयर कोइरालाले आरोप लगाएका छन् । यसैगरी, महानगरका सरसफाइमा पर्याप्त उपकरण नभएको, भएकाहरू पनि बिग्रिएर थन्किएकाले फोहोरमैला व्यवस्थापन गर्न चुनौती बनेको छ ।

पाँच वर्षमा ८३ वटा ऐन, नियम, कार्यविधि, दिग्दर्शन, निर्देशिका जारी गरे पनि कार्यान्वयन हुन नसक्दा कागजी खोस्टो मात्रै भएको छ । करदाताको खर्च भए पनि महानगरमा वारुण यन्त्र सेवा प्रभावकारी हुन नसकेको र गत पाँच वर्षमा वित्तीय स्रोतको अनुमान र यथार्थबीच ठूलो खाडल देखापर्दा राजश्व संकलन न्यून भएको मेयर कोइरालाले जारी श्वेतपत्रमा उल्लेख गरेका छन् । यसैगरी विकास निर्माण कार्यमा उपभोक्ता समिति र ठेकेदारबीच मिलेमतो भएको, अधिकांश निर्माण अधुरै रहेको पनि आरोप लगाएका छन् ।

मेयर कोइरालाले आवधिक योजना तथा क्षेत्रगत योजना तर्जुमाबिना सञ्चालन गरिँदा विकासका ठोस उपलब्धि हासिल हुन नसकेको, शैक्षिक र स्वास्थ्य सेवा पनि चुनौतीपूर्ण बनेको बताएका छन् । महानगरको विपद व्यवस्थापनसम्बन्धी स्थायी सवल संयन्त्रको स्थापना नभएदेखि उपभोक्ता हित, भित्री सडक निर्माण, शौचालय व्यवस्थापन, ढल निकास, ठूला आयोजना पनि अलपत्र भएको जारी श्वेतपत्रमा उल्लेख छ । यति मात्र नभई महानगरभित्र विगतदेखिकै ६ वटा खेलमैदानको मर्मतसम्भार र रेखदेख नहुँदा रंगशाला जीर्ण हँुदै गएको र निर्माणाधीन पशुबधशाला पनि अलपत्र परेको दोष वर्तमान मेयर कोइरालाले लगाएका छन् ।

शेखर कोइराला क्याम्पका नागेश विराटनगर महानगरको मेयर निर्वाचित भएपछि पूर्वमेयर पराजुली बसेको कार्यकक्षमा बस्न मात्र नभएर पस्न पनि चाहेनन् । आफ्नालागि अलग्गै कार्यकक्ष बनाउन लगाएका थिए । लाखाँै खर्चेर नयाँ कोठा, नयाँ महँगा फर्निचर र आकर्षक रंगरोगनसहित निर्माण गरेको पूर्वमेयर पराजुलीको वातानुकूलित कोठामा चाहिँ उपमेयर शिल्पा कार्की बस्दै आएकी छन् । यसले एउटै पार्टीका भए पनि पूर्व मेयर पराजुली र वर्तमान मेयर कोइरालाबीच गहिरो राजनीतिक ‘इगो’ रहेको र आन्तरिक शीतयुद्ध चलिरहेको प्रस्ट भएको छ ।