घरमा मारेर राजमार्गमा श्रीमती पोल्ने डिआईजीको मुद्दामा चोलेन्द्रको प्रायश्चित

निलम्बित प्रधानन्यायाधीश चोलेन्द्रशमशेर राणाले सशस्त्र प्रहरी बलका पूर्वनायव महानिरीक्षक (डिआईजी) रञ्जन कोइरालालाई सजाय छुट गराउन गरेको फैसलाप्रति माफी माग्नुभएको छ । यदि सोही फैसलाको आधारमा महाअभियोग लगाइएको हो भने जनतासमक्ष माफी माग्न तयार रहेको राणाको भनाइ छ ।

जबराले आफूले गरेको उक्त फैसलाप्रति अहिले प्रायश्चित भएको बताउनुभएको छ । आज संसदको महाअभियोग सिफारिस समितिमा बयान दिँदै राणाले श्रीमती गीता ढकालको हत्या अभियोगमा २० वर्ष जेल सजाय सुनाइएका पूर्व डिआईजी कोइराला विरुद्धको मुद्दामा भएको फैसलामा गल्ती भएको स्वीकार गर्नुभएको हो ।

राणाले भन्नुभयो, ‘यो पारिवारिक केस हो । नाबालक छोराहरू इजलासमा उपस्थित भए । ८ वर्ष ६ महिना कैदमा बसिसकेका थिए । न्यायाधीशले मिसिल हेरेर विवेक प्रयोग गरेको हो । नाबालकहरूको पालन पोषणका लागि, पारिवारिक जीवन बिताउन दिइएको आदेश हो । त्यसमा गल्ती भएको छ, यदि त्यसैको आधारमा महाअभियोग लगाएको हो भने, जनतासमक्ष क्षमा माग्छु । मलाई प्रायश्चित भएको छ ।’

उहाँले २० वर्ष जेल सजाए सुनाइएका पूर्व डिआईजीमाथिको सजाय छुट गरी ८ वर्ष ६ महिना कायम गरेपछि सर्वत्र आलोचना भएको थियो ।