महानगर टोली आज असन, इन्द्रचोकमा

काठमाडौँ महानगरपालिकाको टोली फुटपाथमा सञ्चालन भइरहेको अव्यवस्थित व्यापार हटाउने भन्दै असन इन्द्रचोक पुगेको छ । इन्द्रचोकदेखि असन हुँदै ठमेल र भोटाहिटी निस्किने क्षेत्रका सडक किनार र पैदल यात्रु हिँड्ने फुटपाथमा व्यापार व्यवसाय सञ्चालन हुँदा सर्वसाधारणलाई समस्या हुँदै आएको भन्दै महानगर सो क्षेत्रका पुगेको हो ।नजिकिँदै गरेको चाड पर्वलाई ध्यानमा राख्दै महानगरले अव्यवस्थित रूपमा सञ्चालन भइरहेको पार्किङ, मन्दिर वरिपरिको व्यवसायलाई हटाउन लागिएको बताइएको छ ।

महानगरको सूचनालाई अवज्ञा गर्दै व्यापार सञ्चालन गरिरहेका केही पसलेको सामान टोलीले उठाएको छ । असन क्षेत्रमा व्यापारीले फुटपाथमा भाँडाकुँडा, क्रिष्टलका सामग्रीहरू, खेलौना पसल, फेन्सीका सामान, माटाका सामग्री राखेर व्यवसाय सञ्चालन गर्दै आएका छन् ।सडकमा कुनै पनि सामग्री नराख्न र अवैध रूपमा खडा गरिएका संरचना भत्काउन महानगरले स्थानीय व्यापारीलाई यसअघि नै निर्देशन दिएको छ ।