शीतल निवासतर्फ फर्केर नागरिकताविहीन नागरिकहरुको धर्ना

राष्ट्रपति विद्यादेवी भण्डारीलाई नागरिकता विधेयक प्रमाणीकरण गर्न माग गर्दै नागरिकताविहीन नागरिकले राजधानीमा धर्ना दिएका छन् । राष्ट्रपतिले नागरिकता विधेयक तत्काल प्रमाणीकरण गर्नुपर्ने मागसहित आज पनि उनीहरुले माइतीघर मण्डलामा धर्ना दिएका हुन् ।‘बुबाआमा दुवै नेपाली नागरिकका सन्तान अनागरिक कहिलेसम्म ?’, ‘नेपाली आमाको सन्तान अनागरिक कहिलेसम्म ?’ जस्ता ब्यानर र प्लेकार्ड बोकेर उनीहरुले माइतीघरमा विरोध गर्दै आएका छन् ।

संघीय संसदको दुवै सदनबाट दोस्रो पटक पारित भई नागरिकता विधेयक प्रमाणीकरणका लागि गत भदौ २० गते राष्ट्रपति कार्यालयमा पेश गरिएको छ । तर, आज रातिबाट उक्त विधेयक शीतल निवास पुगेको १५ दिन पुग्दैछ । तर राष्ट्रपति भण्डारीबाट प्रमाणीकरण भएको छैन ।