झिसमिसेमा जीप दुर्घटना, घाइतेको उपचार हुँदै

पाल्पामा आज बिहानको झिसमिसेमा जीप दुर्घटना हुँदा चार जना घाइते भएका छन् । बिहान ४ बजेको समयमा जीप सडकबाट तल खसेको बताइन्छ ।

बुटवलबाट यात्रु लिएर जुठापौवा हुँदै अर्घाखाँचीतर्फ जाँदै गरेको लु.१ख १४३१ नम्बरको जीप रैनादेवी छहरा गाउँपालिकामा दुर्घटनाग्रस्त भएको हो ।

जिल्ला प्रहरी कार्यालय, पाल्पाका अनुसार झापाका ४४ वर्षीय कृष्णबहादुर राई र स्थानीय २४ वर्षीय दिपक पुन, १९ वर्षीया हिरा पुन र ४१ वर्षे छबिलाल रास्कोटी घाइते भएका छन् ।

घाइतेहरुको तानसेनस्थित युनाइटेड मिसन अस्पतालमा उपचार भइरहेको बताइएको छ । जीपमा ११ जना थिए । उक्त जीप मध्यरातमा बुटवलबाट त्यसतर्फ गएको प्रहरीको भनाइ छ ।