तिहारमा पिकनिक : नदीमा डुबेर एक बेपत्ता, अर्काको मृत्यु

भेरी नदी किनारमा वनभोज खान गएकामध्ये एक जनाको डुबेर ज्यान गएको छ । अर्का एक जना नदीमा बेपत्ता भएका छन् । जाजरकोट भेरी नगरपालिका–४ का २० वर्षीय रोशन खड्काको मृत्यु भएको छ ।

भेरी नगरपालिका ३ का २६ वर्षका विक्रान्त केसी नदीमा बेपत्ता भएका छन् । डुबेका अर्का वीरेन्द्र शाहीको भने जीवितै उद्धार गरिएको छ । रोशन र वीरेन्द्र डुबेपछि साथीहरुलाई बचाउन गएका विक्रान्त बेपत्ता भएका हुन् । बेपत्ताको खोजी कार्य भइरहेको प्रहरी नायव उपरीक्षक सन्तोष निरौलाले बताए ।

तिहारको अवसरमा सदरमुकाम खलंगामा भएको फुटबल प्रतियोगितामा खसी बाजी जितेका युवाहरुले हिजो भेरी नगरपालिका ११ मटेलास्थित भेरी नदी किनारामा पिकनिक आयोजना गरेका थिए । पिकनिक गएका युवाहरुको नदीमा नुहाउने क्रममा डुबेर मृत्यु भएको प्रहरीले जनाएको छ ।