विमानस्थलको रनवेमा मोटरसाइकल कुदाएकामध्ये २ को मृत्यु

अर्घाखाँची सदरमुकाम सन्धिखर्कमा मोटरसाइकल दुर्घटना भएको छ । निर्माणाधीन विमानस्थल नजिकै भएको मोटरसाइकल दुर्घटनामा दुई जनाको ज्यान गएको हो । दुर्घटनामा अरु दुई जना घाइते भएका छन् ।

सन्धिखर्क नगरपालिका १० शिखरबार्नीमा निर्माणाधीन विमानस्थलको रनवेमा मोटरसाइकल चलाउने क्रममा गएराति अनियन्त्रित दुई मोटरसाइकल दुर्घटनामा परेको बताइन्छ ।

प्रदेश नम्बर २–०३८–प.५०३२ नम्बरको मोटरसाइकल दुर्घटनामा मोटरसाइकलमा सवार सन्धिखर्क नगरपालिका १, मिडिया चोकका २६ वर्षीय रोशन सुनाम र हल लाइनका २२ वर्षीय कृतिम रायमाझीको घटनास्थलमै मृत्यु भएको जिल्ला प्रहरी कार्यालयका प्रमुख डीएसपी मुकुन्द रिजालले बताए ।

अर्को बा. २५ प ८८७६ नम्बरको मोटरसाइकलमा सवार सन्धिखर्क २ आटिकापाटा निवासी ५७ वर्षीय हेमराज भुसाल र २० वर्षीय विष्णु पराजुली घाइते भएका छन् । घाइतेको बुटवलस्थित मर्सिसिटी हस्पिटलमा उपचार भइरहेको प्रहरीको भनाइ छ ।

मोटरसाइकल तीब्र गतिका कारण दुर्घटना भएको हुनसक्ने अनुमान छ । घटनाको बारेमा अनुसन्धान भइरहेको जिल्ला प्रहरी कार्यालयका प्रमुख रिजालले जानकारी दिए ।