प्रधानमन्त्रीको कप फुत्काउन आज दुई तिर दुई भिडन्त
नेपाल क्रिकेट संघ (क्यान) को आयोजनामा आजदेखि प्रधानमन्त्री कप एकदिवसीय पुरुष क्रिकेट प्रतियोगिता शुरु हुँदैछ ।
कीर्तिपुरस्थित त्रिवि क्रिकेट मैदानमा हुने उद्घाटन खेलमा त्रिभुवन आर्मी क्लब र एपीएफ क्लबले प्रतिस्पर्धा गर्दैछन् । आजै मूलपानी क्रिकेट मैदानमा नेपाल पुलिस क्लब र बागमती प्रदेशबीच अर्को खेल हुनेछ ।
प्रतियोगितामा सात प्रदेश र तीन विभागीय गरी १० टिमको सहभागिता रहने छ । सहभागी १० टिमलाई दुई समूहमा विभाजन गरिएको छ ।
समूह ‘ए’मा एपिएफ क्लब,त्रिभुवन आर्मी क्लब,कर्णाली,गण्डकी र सुदूरपश्चिम प्रदेश छन् । समूह ‘बी’मा नेपाल पुलिस क्लब,बागमती, लुम्बिनी,मधेस र प्रदेश १ छन् ।
क्यानका अनुसार विजेता टिमले १० लाख रुपैयाँ प्राप्त गर्नेछ भने उपविजेताले पाँच लाख पाउनेछ । सेमिफाइनलमा पुग्ने प्रत्येक टिमले ५० हजार रुपैयाँ पाउने छन् ।
त्यस्तै,सर्वोत्कृष्ट खेलाडी,उत्कृष्ट बलर र ब्याटरले २०–२० तथा इमर्जिङ खेलाडीले १० हजार रुपैयाँ प्राप्त गर्ने क्यानले जानकारी दिएको छ । प्रत्येक खेलका प्लेयर अफ दि म्याचले ५ हजार प्राप्त गर्नेछन् ।
टिप्पणीहरू