निर्वाचन सामग्री अति दुर्गममा पुग्यो, सुगम जिल्लामा बाँकी

निर्वाचन आयोगले आठ वटा दुर्गम पहाडी जिल्लामा निर्वाचन सामग्री ढुवानी गर्ने काम सम्पन्न भएको जनाएको छ । मंसिर ४ गते हुने प्रतिनिधि सभा तथा प्रदेश सभा निर्वाचनका लागि ५७ प्रकारका सामग्रीहरू ती जिल्लामा पुगिसकेको छ ।

जसमा गण्डकी प्रदेशको मनाङ र मुस्ताङ, कर्णाली प्रदेशको हुम्ला, जुम्ला, मुगु, कालिकोट, डोल्पा र सुदूरपश्चिमको बाजुरामा निर्वाचन सामग्री पुर्याइएको छ ।

आयोगका अनुसार अन्य ५१ जिल्लामा निर्वाचन सामग्रीमध्ये केही पठाइसकिएको छ । ती जिल्लामा बाँकी सामग्री ढुवानी गर्ने कार्य जारी गरेको आयोगले बताएको छ ।

निर्वाचनका लागि मतपेटिका, मतपत्र, छेकाबारा, कोरा कपडा, स्वस्तिक छापलगायत सामग्रीहरू देशभर पठाउने कार्य भइरहेको छ ।