बन्दुक देखाइ देखाइ पत्नीमाथि बक्सिङ्ग

बन्दुक देखाइ देखाइ निर्घात पत्नी कुट्ने एक युवकलाई प्रहरीले समातेको छ।

पक्राउ पर्नेमा मोरङ उर्लाबारी-२ निवासी ३१ वर्षीय दिपक विश्वकर्मा रहेका छन् । उनलाई प्रहरीले अस्ति बुधवार साँझ घरबाटै एक थान भरुवा बन्दुकसहित पक्राउ गरिएको मोरङ प्रहरीका प्रवक्ता डीएसपी दीपक श्रेष्ठले जानकारी दिए ।

मादक पदार्थ सेवन गरेका विश्वकर्माले भरुवा बन्दुक तेर्साएर डर त्रास देखाउँदै श्रीमतीलाई कुटपिट गरेको प्रारम्भिक अनुसन्धानबाट खुलेको डिएसपी श्रेष्ठले जानकारी दिए । श्रीमतीलाई कुटपिट गरिरहेको सूचना पाएलगत्तै अस्थायी प्रहरी चौकी मंगलबारेबाट खटिएको टोलीले विश्वकर्मालाई नियन्त्रणमा लिएको हो ।

विश्वकर्माविरुध्द हातहतियार, खरखजाना मुद्दा चलाउन अदालतबाट बिहीबार म्याद थप गरेर घटनाको बाँकी अनुसन्धान अघि बढाइएको मोरङ प्रहरीले जनाएको छ।