प्रचण्ड कर्णालीका विकट जिल्ला जाँदै,पत्नी सीताको स्वास्थ्य अवस्था जटिल

नेकपा माओवादी केन्द्रका अध्यक्ष पुष्पकमल दाहाल प्रचण्ड चुनावी सभालाई सम्बोधन गर्न आज कर्णाली प्रदेशका माथिल्ला तीन जिल्ला जाने हुनुभएको छ । उहाँले तीन जिल्लामा राखिएको गठबन्धनको चुनावीसभालाई सम्बोधन गर्ने बताइएको छ ।

उहाँले आज जुम्ला,कालिकोट र हुम्लामा चुनावीसभालाई सम्बोधन गर्ने कार्यक्रम तय भएको हो । प्रचण्ड बिहान ९ बजे विमानबाट सुर्खेत पुग्ने र त्यहाँबाट हेलिकप्टरमा पहिले जुम्ला जाने कार्यक्रम छ । १० बजे जुम्लाको आमसभालाई सम्बोधन गरेपछि उहाँ हुम्लाको सर्केघाट जाँदै हुनुहुन्छ ।

सर्केघाटको चुनावी सभालाई सम्बोधन गरेपछि हुम्लाको सदरमुकाम सिमिकोट र दिउँसो कालिकोट जाने तालिका छ । आजै साँझ राजधानी फर्कने बताइएको छ ।

यता पत्नी सीता दाहालको स्वास्थ्य अवस्था नाजुक हुँदै गएको छ । गत साता १५ दिनको अस्पताल बसाईपछि डिस्चार्ज हुनुभएकी उहाँलाई अस्ति पुनः मेडिसिटी अस्पतालमा भर्ना गरिएको छ । सीतालाई सघन उपचार कक्षमा राखेर विशेष उपचार गरिएको अस्पताल स्रोतले बताएको छ ।