एमाले अध्यक्ष तीन घण्टाको फरकमा सुदूरपश्चिमको तीन ठाउँ पुग्ने, सत्तागठबन्धनका नेता चितवनमा

एमाले अध्यक्ष केपी शर्मा ओलीले आज सुदूरपश्चिम प्रदेशको तीन ठाउँमा आयोजना गरिएको चुनावी सभालाई सम्बोधन गर्ने कार्यक्रम छ ।

कात्तिक १८ गते दार्चुलाबाट चुनावी सभाको सुरुवात गुर्नुभएको अध्यक्ष ओली आज फेरि सुदूरपश्चिम जान लाग्नुभएको हो ।

एमाले सुदूरपश्चिमका सचिव धर्मराज पाठकका अनुसार उहाँले आज तीन स्थानका चुनावी सभालाई सम्बोधन गर्दै हुनुहुन्छ । बिहान ११ बजे डोटीको दिपायल, २ बजे कैलालीको अत्तरियामा र ५ बजे लम्कीको चुनावी सभालाई सम्बोधन गर्ने बताइएको छ ।

यसअघि उहाँले दार्चुला, बैतडी र महेन्द्रनगरका तीन वटा सभालाई सम्बोधन गर्नुभएको थियो ।

आजै सत्ता गठबन्धनका शीर्ष नेताहरुले चितवनमा चुनावी सभालाई सम्बोधन गर्ने कार्यक्रम छ । प्रधानमन्त्री तथा कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाललगायतले सम्बोधन गर्ने आयोजक पक्षले बताएको छ ।