‘भूमिहीनको तथ्याङ्क उपलब्ध गराइयोस्’

बागमती किनारमा रहेका सुकुम्बासी, भूमिहीन तथा अव्यवस्थित बसोबासीहरुका बारेमा सम्पूर्ण सूचना उपलब्ध गराउने माग गर्दै अधिकार सम्पन्न बागमती सभ्यता एकीकृत विकास समितिमा निवेदन दर्ता गरिएको छ ।

अधिवक्ता राजुप्रसाद चापागाईँले सुकुम्बासी परिवारहरुको बारेमा सम्पूर्ण सूचना उपलब्ध गराइदिन माग गर्दै निवेदन दिएका हुन् । समितिको कार्य क्षेत्रभित्र पर्ने बागमती किनारलगायतका स्थानमा के कति संख्यामा भूमिहीन सुकुम्बासी परिवारको बसोबास छ ? त्यस्ता परिवारमध्ये कुनै विकल्प नभएका तथा उठीबास लगाउँदा आवासविहिनको जोखिममा पर्ने परिवारको संख्या कति छ ? यसको विवरण शीघ्र उपलब्ध गराउन उनले भनेका हुन् ।

त्यस्तै, उनले आवासम्बन्धी ऐनको दफा ५ को उपदफा (५) बमोजिम विस्थापनको समयमा विशेष ध्यान दिनुपर्ने समूह ‘ज्येष्ठ नागरिक, बिरामी, अपाङ्गता भएका व्यक्ति, बालबालिका, असहाय, अशक्त, गर्भवती महिला’ को विवरण पनि मागेका छन् । 

भूमिहीनको पक्षमा वकालत गर्दै अधिवक्ता चापागाईंले आफूसहित अन्य संघसंस्थाले सुकुम्बासी परिवारलाई बासस्थानबाट विस्थापन नगर्न, नगराउन परमादेश माग्दै दायर गरेको मुद्दा सर्वोच्च अदालतमा विचाराधीन अवस्थामा रहेको स्मरण गराएका छन् ।