दुई हुण्डी कारोबारी रंगेहात पक्राउ, कोठाभरी पैसा

सप्तरीमा स्रोत नखुलेको रकमसहित प्रहरीले दुई जना हुण्डी कारोबारीलाई पक्राउ गरेको छ । 

बोदेबरसाइन नगरपालिका–९, देउरीका ३२ वर्षीय रामविलास साह तेली र सोही नगरपालिका–७ का ५० वर्षीय मायानन्द झालाई प्रहरीले नियन्त्रणमा लिएको हो । उनीहरुको साथबाट ५२ लाख ८९ हजार ५ सय रुपैँया, दुई ओटा मोबाइल सेट र हिसाब लेखिएको पाँच थान कपी बरामद गरिएको छ । 

कोठाको खाटमाथि कपडाले छोपेर राखिएको २८ लाख ८९ हजार, सोही कोठामा बसिरहेका साहको साथबाट १५ लाख र झााको साथबाट ९ लाख गरी जम्मा ५२ लाख ८९ हजार ५ सय नेपाली रुपैयाँ प्रहरीले नियन्त्रणमा लिएको बताइएको छ । 

नेपाल प्रहरीको केन्द्रीय अनुसन्धान ब्यूरो र इलाका प्रहरी कार्यालय, कडरबोना सप्तरीबाट संयुक्त रुपमा खटिएको टोलीले गोप्य सूचनाको आधारमा उनीहरुलाई पक्राउ गरेको हो । पक्राउ परेका दुवै जनालाई आवश्यक कारबाहीको निम्ति राजस्व अनुसन्धान कार्यालय इटहरी पठाइएको छ ।