'भोलि पोखरामा रमाइलो गर्नुपर्छ' भनेर जहाज चढेकी लोकगायिका पनि दुर्घटनामा

लोकदोहोरी गायिका निरा छन्त्याल पोखरामा दुर्घटनाग्रस्त यति एयरलाइन्सको विमानमा रहेको आशंका गरिएको छ । यसबारे औपचारिक जानकारी नभए पनि यात्रुको सूचीमा 'निरा छन्त्याल' नाम रहनु र उनले फेसवुकमा पोखरा जान लागेको जानकारी गराउनुले दुर्घटनामा परेको अनुमान गरिएको हो । 

हिजो उनले फेसवुकमा 'भोलि पोखरामा रमाइलो गर्नुपर्छ' लेखेकी थिइन् । 'छन्त्याल भवन काठमाडौंको माघि सकियो, अब भोलि पोखरामा रमाइलो गर्नुपर्छ❤️', तस्वीरसहित उनको फेसवुकमा स्टाटस छ । 

लोकदोहोरी क्षेत्रमा चर्चित छन्त्याल माघिको अवसरमा आयोजित कार्यक्रमका लागि पोखरा गएको उनको स्टाटसले प्रष्ट्याउँछ । सोही जहाजमा पोखराका पत्रकार त्रिभुवन पौडेलसमेत परेको आशंका छ । आधिकारिक पुष्टि नभए पनि उनीनिकट पत्रकारहरुले  दुर्घटनामा पौडेलको निधन भएको बताएका छन् । 

काठमाडौँबाट पोखरा उडेको यती एयरलाइन्सको एन–एनसी एटीआर ७२ विमान आज बिहान पोखरा विमास्थल नजिकै सेती खोंचमा दुर्घटना भएको हो । ६८ जना यात्रु र चालक दलका चार सदस्यसहित ७२ जना लिएर उडेको जहाज दुर्घटना हुँदा ठूलो मानवीय क्षति भएको छ । हालसम्म ३६ जनाको शव फेला परेको र अहिले उद्धारको काम भैरहेको प्रहरीले जनाएको छ ।