दुर्घटनाग्रस्त विमानका यात्रुको उद्धारमा सुरक्षाकर्मीहरुले लगाए ज्यानको बाजी

आज बिहान पोखरा अन्तर्राष्ट्रिय विमानस्थल नजिकै भएको विमान दुर्घटनाका यात्रुको उद्धारमा सुरक्षाकर्मीहरु निकै साहसका साथ खटिएका छन् । नेपाली सेना,नेपाल प्रहरी र सशस्त्र प्रहरी बलका धेरै जना तत्काल घटनास्थल पुगेका थिए । 

सेती नदीको खोंचमा खसेको ६८ जना यात्रु र चार जना चालक दलका सदस्य सवार यती एअरलाइन्सको एटीआर विमानका प्रायः सबैको जलेर निधन भएको छ । त्यसमध्ये ३० जनाभन्दा बढीको शव नदीको खोंचबाट जोखिमपूर्ण अवस्थामा माथिल्लो भागमा ल्याइएको छ ।

सशस्त्र प्रहरी बल र नेपाली सेनाका केही जवान शरीरमा डोरी बाँधेर र भर्याङबाट एक सय फीटभन्दा तलको नदीमा पुगेका छन् । भीर र नदीको किनारमा पुगेका अधिकांश यात्रुलाई शरीर आगोले जलेको,कतिपयको अंगभंग भएको र विमानको भग्नावशेषमा च्यापिएको अवस्थामा पाइएको थियो ।

घटनास्थलमा सशस्त्र प्रहरी बलका दुइ सय २७ जनाको टोली खटिएको थियो । सशस्त्रको नम्बर २४ गण हेडक्वार्टर कालिका कास्कीका गणपति एसपी विजय केसीको कमाण्डमा १५० जना दुर्घटनालगत्तै त्यहाँ पुगेका थिए । त्यसपछि सशस्त्रकै नेपाल विपद तथा दंगा व्यवस्थापन तालिम शिक्षालय लामपाटनबाट निरीक्षक राजेशकुुमार सिंहको कमाण्डमा ६२ जना पनि पुगेको पाइयो ।

त्यसैगरी नेपाली सेनाको भगवती दल गण फूलबारीबाट प्रमुख सेनानी सञ्जयकुमार खत्रीको कमाण्डमा १९२ जना र जिल्ला प्रहरी कार्यालय कास्कीबाट प्रहरी उपरीक्षक अजय केसीको कमाण्डमा ३ सय जनाको टोली पनि लगत्तै घटनास्थल पुगेर उद्धार कार्यमा संलग्न भएको थियो । सशस्त्र प्रहरी बलको तर्फबाट बाहिनीपति नायव महानिरीक्षक शम्भु सुवेदीसमेत घटनास्थलको स्थलगत निरीक्षणसँगै प्रत्यक्ष खोज तथा उद्धार कार्यको कमाण्डमा संलग्न भएको सशस्त्र प्रहरी बलले जनाएको छ ।

सशस्त्र प्रहरी बलको तर्फबाट तीन जना गोताखोरसहित १५ जनाको विपद व्यवस्थापन तालिमप्राप्त टोली चितवनको कुरिनटारबाट थप मद्दतको निम्ति पोखरा पुगेको बताइएको छ ।