वर्षमानलाई थप उपचारको निम्ति चीन लैजान नपर्ने

गत साता गृह जिल्लामा बिरामी परेपछि हेलिकोप्टरवास उपचारको निम्ति राजधानी ल्याइएका माओवादी केन्द्रका उपमहासचिव तथा पूर्वमन्त्री वर्षमान पुन ‘अनन्त’को अवस्था सामान्यउन्मुख छ । पारिवारिक स्रोतका अनुसार उहाँको पेटमा जमेको पानी हिजो निकालिएपछि थप स्वास्थ्यलाभ भएको छ । 

सिग्लार नाजार सिण्ड्रोम टाइप २ नामको दुर्लभ जण्डिसबाट पीडित पुनले यसअघि दुई पटक चीनमा गएर उपचार गर्नुभएको थियो । बैंककमा समेत निको नभएपछि उहाँ त्यसबेला चीन जानुभएको थियो । करोडौं मानिसमध्ये एकाधलाई हुने दुर्लभ जण्डिसबाट पुन लामो समयदेखि पीडित हुनुहुन्छ ।

‘यसपटक चीन लैजान पर्दैन होला,’ अस्पताल स्रोतको हवाला दिँदै परिवारका सदस्यले बताएका छन् । चीनको पीस एण्ड डेभलपमेन्ट फाउण्डेसनले प्रदान गरेको न्यानो कपडा वितरण गर्न पुन केही दिन अगाडि गृह जिल्ला जानुभएको थियो । सोही क्रममा उहाँ बिरामी परेपछि हेलिकोप्टरमा राजधानी ल्याइएको हो । 

जिल्ला जानुअघि स्वाथ्य परीक्षण गरिएको गर्दा पेटमा पानी भरिएको देखिएको थियो । तर रोल्पा पुगेको बेला पेटमा थप समस्या देखिएपछि तत्काल ल्याइएको हो । सोही क्रममा हिजो ललितपुरको सुमेरु सिटी अस्पतालमा पेटबाट 
पानी निकालिएको छ ।

तर रगतमा जण्डिस बढाउने बिलुरुविनको मात्रा नबढेकाले आत्तिनुपर्ने अवस्था नरहेको चिकित्सकहरुको भनाइ छ । बिलुरुविनको मात्रा बढेमा शरीरमा जण्डिस देखिन्छ । तर अहिले त्यस्तो कुनै संकेत नरहेको परिवार निकट एक जना नातेदारले बताए ।