स्काइ ट्रकमा ल्याइयो २३ शव, आफन्तलाई चिन्न मुश्किल

पोखरामा अस्ति भएको यती एअरलाइन्सको एटीआर विमान दुर्घटनामा निधन भएकामध्ये २३ वटा शव आज काठमाडौं ल्याइएको छ । नेपाली सेनाको स्काई ट्रकमा ल्याइएका ती शव आगोले डढेका र अंगभंग भएकाले चिन्न मुश्किल पर्ने अवस्थामा रहेको बताइएको छ । 

सेनाको कासा एनए ०६२ स्काइ ट्रकमा ल्याइएका २३ शवमध्ये १४ जना पुरुषको रुपमा चिनिन्छन् । पाँच जना महिला रहेको र चार वटा शवको लिंगसमेत पहिचान गर्न नसकिने अवस्था रहेको छ । तीमध्ये एउटा शव हड्डी पनि जलेको अवस्थामा ल्याइएको छ । जनआस्थालाई प्राप्त विवरणअनुसार पुरुष र महिला छुट्टिएका १९ शवमध्ये सबैको शरीरका पूरै अंग जलेको अवस्थामा छन् । केही सम्पूर्ण भाग क्षतविक्षत भएको अवस्थाका पनि छन् ।

एउटा लाश पूरै जलेको तर १० टुक्रा हड्डी बाँकी रहेको अवस्थामा भेटिएको हो । त्यो पनि डिएनए परीक्षणको निम्ति आज काठमाडौं ल्याइएको हो ।