उपप्रधानमन्त्रीसँग इयुकी राजदूतको प्रश्न : विद्युत निर्यात गर्ने सम्बन्धमा के भइरहेको छ ?

उपप्रधान तथा ऊर्जा, जलस्रोत तथा सिंचाईमन्त्री सँग नेपालका लागि युरोपियन युनियनकी राजदूतले भेटवार्ता गर्नुभएको छ । मन्त्री राजेन्द्र लिङ्देन र राजदूत नोना डिप्रजबीच आज मन्त्रालयमा कुराकानी भएको बताइएको छ ।

भेटमा नवीकरणीय ऊर्जा क्षेत्रमा पुर्याएको सहयोगको प्रशंसा गर्दै मन्त्री लिंङ्देनले सहयोगको निरन्तरताको निम्ति आग्रह गर्नुभएको हो । मन्त्रालयका अनुसार भेटमा राजदूत नोनाले नेपालमा उत्पादित विद्युत छिमेकी राष्ट्रमा निर्यात गर्ने विषयमा विशेष चासो राख्नुभएको छ । 

मन्त्री लिङ्देनले सो सम्बन्धमा बंगलादेशसँगको सम्झौता प्रक्रियामा रहेको उल्लेख गर्दै आगामी दिनमा ठूलो परिमाणमा विद्युत छिमेकी मुलुकमा निर्यात गर्ने सम्बन्धमा आवश्यक गृहकार्य गरिरहेको धारणा राख्नुभएको हो ।