सरकारी वकिलको कार्यालयले थाल्यो रविको राहदानीमाथि अनुसन्धान

जिल्ला सरकारी वकिलको कार्यालय काठमाडौंले राष्ट्रिय स्वतन्त्र पार्टीका सभापति तथा पूर्व गृहमन्त्री रवि लामिछानेको दोहोरो राहदानीमाथि अनुसन्धान थालेको छ । उनको अमेरिकी र नेपाली राहदानीबारे परेको उजुरीमाथि अनुसन्धान गर्ने क्रममा लामिछानेको राहदानी र नागरिकतासम्बन्धी सबै कागजात मगाइएको बताइएको छ ।

रविको राहदानीबारे अस्ति जिल्ला सरकारी वकिलको कार्यालय काठमाडौंमा युवराज पौडेलले उजुरी गरेका थिए । उजुरीमा लामिछानेले अमेरिकी नागरिकको हैसियतमा नेपाल आएर राहदानी लिएको विषयलाई फौजदारी अपराध भएको बताइएको छ । सोही विषयमा अनुसन्धान गर्न पौडेलले जिल्ला सरकारी वकिलको कार्यालयमा निवेदन दर्ता गराएका हुन् । 

यसअघि प्रहरीले उनको निवेदन दर्ता गर्न मानेको थिएन । कार्यालयले अध्यागमन विभाग, जिल्ला प्रशासन कार्यालय काठमाडौं र राहदानी विभागसँग राहदानी र नागरिकतासम्बन्धी कागजात माग गरेको हो ।