जनयुध्द दिवसको बिदा दिएकोमा शान्ति समाजको आपत्ति, राष्ट्रपतिको बाटो पन्छाएकोमा निन्दा

मानव अधिकार तथा शान्ति समाजले ‘जनयुद्ध दिवस’ को अवसरमा भोलि दिन लागिएको सार्वजनिक बिदाप्रति आपत्ति जनाएको छ । बाग्मती र कर्णाली प्रदेश सरकारले जनयुद्ध दिवसका अवसरमा सार्वजनिक बिदा दिने निर्णय गरेपछि समाजले गम्भीर आपत्ति प्रकट गरेको छ । 

बिदा दिने निर्णय विवादास्पद भएको उल्लेख गर्दै समाजले भनेको छ , ‘यो सरासर लोकतन्त्र र अहिंसाको सार्वभौम मान्यताको प्रतिकूल भयो ।’ बाग्मती प्रदेश सरकार, मन्त्रिपरिषद्को मिति २०७९ माघ २४ गतेको बैठकले र त्यसभन्दा अघि कर्णाली प्रदेश सरकारले पनि ‘जनयुद्ध दिवस’ को अवसरमा भोलि प्रदेशभर सार्वजनिक बिदा दिने निर्णय गरेको छ । सोही निर्णयप्रति मानव अधिकार तथा शान्ति समाज तीव्र असहमति र गम्भीर आपत्ति व्यक्त गरेको हो । 

समाजले आज जारी विज्ञप्तिमा अस्ति शुक्रबार राष्ट्रपतिको सवारीको क्रममा वीर अस्पतालका चिकित्सकमाथि भएको हातपातप्रति गम्भीर ध्यानाकर्षण भएको जनाएको छ ।