नुवाकोटमा बस दुर्घटना : तीनको मृत्यु, दुई दर्जन घाइते (विवरणसहित)
नुवाकोटमा आज भएको बस दुर्घटनामा तीन जनाको मृत्यु भएको छ भने २३ जना घाइते भएका छन् । बट्टारबाट तारकेश्वर गाउँपालिका–१ दाङसिङ जाँदै गरेको बा.२ ख ८४४५ नम्बरको बस आज अपरान्ह विदुर नगरपालिका–१२, चैनपुरमा दुर्घटना भएको हो ।
गुडिरहेको बस एक्कासी अनियन्त्रित भई सडकबाट तल खसेर भएको उक्त दुर्घटनामा दुई जनाको घटनास्थलमै र एक जनाको अस्पताल लैजाने क्रममा बाटोमा मृत्यु भएको नुवाकोट प्रहरीले जनाएको छ ।प्रहरीका अनुसार मृत्यु हुनेमा विदुर नगरपालिका–३ का बाबुराम नेपाली र विदुर नगरपालिका–६ का रामप्रसाद अर्याल छन् । मृतक अर्की एक जना महिलाको सनाखत भएको छैन ।
दुर्घटनामा घाइते हुने अधिकांश तारकेश्वरका छन् । गम्भीर घाइते आठ जनालाई थप उपचारका लागि काठमाडौं पठाइएको छ भने अन्यको त्रिशुली अस्पतालमा उपचार भइरहेको छ । टाउकोमा चोट लागेका र एक गर्भवती महिलालाई त्रिशुली अस्पतालले काठमाडौं रिफर गरेको हो ।
टिप्पणीहरू