राजधानीका सडकमा सवारी साधनको गति ५० किलोमीटरमा सीमित

काठमाडौँ उपत्यकाका सडकमा सवारी साधन गुडाउनेले अबदेखि प्रतिघण्टा ५० किलोमीटरको गतिमा मात्रै हाँक्न पाउने भएका छन् । उपत्यका ट्राफिक प्रहरी कार्यालयले नयाँ व्यवस्था गरेपछि सवारी साधनको गति सीमित भएको हो ।

सवारी तथा यातायात व्यवस्था ऐन २०४९ र नियमावली २०५४ मा उल्लेखित गति नियन्त्रणसम्बन्धी व्यवस्था र सडकको अवस्थालाई ध्यानमा राखेर नयाँ व्यवस्था गरिएको बताइएको छ । ट्राफिकले सवारी दुर्घटना न्यूनीकरण तथा रोकथामका लागि उक्त नियम लागू गरिएको दाबी गरेको छ ।

राजधानीका सडकमा चार पाङ्ग्रे तथा दुई पाङ्ग्रे सवारी साधनको अधिकतम गति प्रतिघण्टा ५० किलोमीटर तोकिएको छ । चक्रपथको सर्भिस ट्रयाकमा प्रतिघण्टा अधिकतम २० किलोमिटर गति तोकिएको उपत्यका ट्राफिक प्रहरी कार्यालयले जनाएको छ ।

कोटेश्वर–भक्तपुर सडकखण्डमा पनि सवारी साधनको गति ५० किलोमिटर नै तोकिएको छ । तोकिएको मापदण्ड विपरित सवारी साधन चलाउने चालकलाई कानुनबमोजिम कारबाही गरिने ट्राफिकको भनाइ छ ।