आठ दलीय गठबन्धनले राष्ट्रपतिका भोटरलाई भेला गरेर तालिम दिने

काँग्रेस–माओवादी नेतृत्वको आठ दलीय गठबन्धनले संघ तथा प्रदेशका सांसदहरुलाई छुट्टाछुट्टै भेला गरेर अभिमुखीकरण प्रशिक्षण दिने भएको छ । 

काँग्रेस उपसभापति पूर्णबहादुर खड्का नेतृत्वको गठबन्धनको कार्यदल बैठकले राष्ट्रपति निर्वाचनलाई लक्षित गर्दै तालिम आयोजना गर्ने निर्णय गरेको हो । आज सिंहदरबारस्थित काँग्रेस संसदीय दलको कार्यालयमा बसेको कार्यदलको बैठकले फागुन १८ गते प्रतिनिधि र राष्ट्रियसभाका सांसदहरुलाई काठमाडौंमा र भोलिपल्ट १९ गते सातै प्रदेशका सांसदलाई सम्बन्धित प्रदेशको राजधानीमा भेला गरेर प्रशिक्षण दिने निर्णय गरेको हो । 

सांसदहरुको भेलामा आठ दलीय गठबन्धनको बनाउनुको औचित्य र राष्ट्रपतिमा आफ्ना उम्मेदवारलाई जिताउनुपर्ने कारणका विषयमा सांसदहरुलाई प्रष्ट पारिने जनाइएको छ । त्यस्तै, राष्ट्रपति चुनावको अघिल्लो दिन फागुन २४ गते संघ र प्रदेश दुवैतिरका सांसदहरुलाई एकै ठाउँमा राखेर गठबन्धनका शीर्ष नेताले प्रशिक्षण दिने कार्यक्रम पनि कार्यदल बैठकले तय गरेको छ । 

२५ फागुनमा हुने राष्ट्रपति निर्वाचनमा गठबन्धनका तर्फबाट रामचन्द्र पौडेल साझा उम्मेदवार छन् भने एमालेले सुवास नेम्वाङलाई मैदानमा उतारेको छ । प्रतिनिधिसभा, राष्ट्रियसभा र प्रदेशसभाका सांसदले निर्वाचनमा भोट हाल्नेछन् ।