अन्तिम क्षणमा भोट माग्दै राष्ट्रपतिका उम्मेदवार पौडेल

आगामी बिहीबार हुने राष्ट्रपति निर्वाचनमा उम्मेदवार रहेका नेपाली काँग्रेसका वरिष्ठ नेता रामचन्द्र पौडेलले अन्तिम क्षणमा भोट मागेका छन् । आज बिहान डल्लुस्थित निवास पुगेर नेकपा एकीकृत समाजवादीका सम्मानित नेता झलनाथ खनालसँग भोट मागेका पौडेलले आजै साँझ राप्रपा अध्यक्षसँग भेट गरेका छन् । 

साँझ ६ बजे राप्रपाको मुख्यालय धुम्बाराही पुगेका पौडेलले अध्यक्ष राजेन्द्र लिङ्देनसँग आफूलाई मतदान गर्न आग्रह गरेका हुन् । पौडेल र लिङ्देनबीच साँझ ४५ मीनेट कुराकानी भएको बताइन्छ ।निर्वाचन आयोगले आज राति १२ बजेपछि निर्वाचन प्रचारप्रसारमा रोक लगाएको छ । आयोगका अनुसार आज रातिदेखि मौन अवधि शुरु हुनेछ । 

राष्ट्रपति निर्वाचनमा पौडेल सत्ता गठबन्धनलाई समर्थन गरेका आठ दलका साझा उम्मेदवार हुन् भने एमालेको तर्फबाट उपाध्यक्ष तथा संविधानसभा अध्यक्ष सुवास नेम्वाङ पनि प्रतिस्पर्धी छन् ।