‘झारेझारे निम्तो’ आउँदा रवि रिसले रनन

आफैँ संस्थापक  सदस्य भएको संस्थामा सम्मान लिन बोलाइँदा राष्ट्रिय स्वतन्त्र पार्टीका सभापति रवि लामिछानेले ‘झारेझुरे कार्यक्रम’ भन्दै सहभागी हुन मानेनन् । चलचित्र पत्रकार संघले नवौँ महाधिवेशनका अवसरमा संस्थापक कार्यसमितिका पदाधिकारी तथा सदस्यलाई सम्मान गर्न भनी रविलाई बोलाएको थियो । उनी गएनन्, बरु पत्नीमार्फत खबर पठाए, ‘झारेझुरे कार्यक्रममा जाने गरेको छैन ।’ 

रवि सीधै सम्पर्कमा नआएपछि संघका तत्कालीन अध्यक्ष दिनेश सिटौलाले पत्नी निकितामार्फत खबर गरेका थिए । कार्यक्रममा संस्थापकमध्ये अध्यक्ष भरत शाक्य अमेरिकामा भएका कारण अनुपस्थित थिए । उपाध्यक्षमध्ये अनन्त वाग्ले पुगे तर वर्षान्तले गर्दा सम्मानित हुन मिलेन । अर्का संस्थापक उपाध्यक्ष डिपी साह चक्रवर्ती जबर्जस्ती करणी मुद्दा लागेर मकवानपुरको भीमफेदी कारागारमा छन् ।

कार्यक्रममा संस्थापक महासचिवको हैसियतमा शान्तिप्रिय, सचिव विश्वमणि सुवेदी, कोषाध्यक्ष सुव्रतराज आचार्य, सदस्यमध्ये राजन घिमिरे मात्रै उपस्थित भए । सदस्यमध्ये सविन शाक्यले केही वर्षअघि आत्महत्या गरेका थिए । गीतकारसमेत रहेका बाबुराम दाहाल र जयप्रकाश रिजाल अमेरिकामा छन् । विनोद अर्याल बाबाजीको भेष धारण गरेर मकवानपुरस्थित एक आश्रममा बस्दै आएका छन् । फोटो पत्रकारसमेत रहेका मोहन किम्रिक कसैको सम्पर्कमा छैनन् । नेपालमै हुनेमध्ये रवि लामिछानेबाहेक कार्यक्रममा अरु सबै उपस्थित थिए । संघको नवौं महाधिवेशनबाट नुवाकोटे समीर बलामीको अध्यक्षतामा नयाँ कार्यसमिति चुनिएको छ ।

उपाध्यक्ष संगठनतर्फ विजय सुवेदी ‘आवाज’,कार्यक्रमतर्फ उपाध्यक्ष रातोपाटीकर्मी कुवेर गिरी र उपाध्यक्ष महिलातर्फ सुरक्षा भट्टराई विजयी हुँदा रघुनाथ सापकोटा महासचिवमा निर्वाचित भए । यस्तै  सचिवमा नविन गिरी, समावेशी सचिवमा उद्धव रसाइली, कोषाध्यक्षमा मनिष कार्की र सह–कोषाध्यक्षमा मनिष दाहाल निर्विरोध छानिएका छन् ।  कार्यसमिति सदस्यमा सुरेन्द्र थापा, सीपी जैसी, अनुप भट्टराई ‘फरक कोण’, निशा बजगार्इं, अर्जुन गुरागार्इं, कृष्ण पाण्डे र  महिला सदस्यतर्फ सुष्मा कार्कीका साथैं समावेशी सदस्यमा मोहम्मद जलिम चयन भएको संघले जनाएको छ ।