शीतल निवासको ट्वीटर विवादमा निवर्तमान राष्ट्रपतिको चर्को आलोचना

केही वर्षअघि तत्कालीन प्रधानमन्त्री बालुवाटारस्थित सरकारी निवासबाट बाहिरिँदा त्यहाँका भाँडावर्तन यताउता भएकोबारे सामाजिक सञ्जालमा आलोचना भएको थियो । सरकारी क्वार्टर छाड्दा मन्त्रीहरुले चम्चा, गम्छाजस्ता अत्यन्तै सामान्य कुरामा पनि लोभ देखाउने गरेको चर्चा अहिले पनि हुने गर्छ । यसपटक पनि त्यस्तै एउटा विषयले सामाजिक सञ्जाल गर्माएको छ । कारण हो –राष्ट्रपति कार्यालयको ट्वीटर ह्याण्डलको विषय । 

उच्च ओहदामा रहने व्यक्तिहरुले प्रयोग गर्ने सामाजिक सञ्जाल राष्ट्रिय सम्पत्तिका रुपमा रहन्छ र रहनुपर्छ । त्यसकारण पदबाट बाहिरिँदा त्यस्ता बौद्धिक सम्पत्तिहरु संस्थाकै सम्पत्तिका रुपमा जिम्मेवारी सम्हाल्ने नयाँ व्यक्तिलाई हस्तान्तरण गर्ने प्रचलन विश्वभर छ । तर, दुई कार्यकाल गरी सात वर्ष मुलुकको सबैभन्दा माथिल्लो पदमा रहनुभएका निवर्तमान राष्ट्रपति विद्यादेवी भण्डारीले राष्ट्रपति कार्यालयको नाममा सञ्चालित ट्वीटर निजी बनाएको भन्दै अहिले उहाँको चर्को आलोचना भएको छ । 

भण्डारी शितल निवासबाट बाहिरिँदा राष्ट्रपति कार्यालयको भेरिफाइड ट्वीटर ह्याण्डल @presidentofNP लाई @BidyaDBhandari मा रुपान्तरण गरिएपछि सरकारी सम्पत्ति हडपेको ट्वीटर प्रयोगकर्ताहरुले आरोप लगाएका छन् ।

यसप्रति कडा टिप्पणी गर्दै एक जनाले ट्वीट गरेका छन्, ‘राष्ट्रपति कार्यालयबाट सञ्चालन भइरहेको राष्ट्रपति संस्थाका रुपमा भेरिफाइड रहेको ट्वीटर खाता त पदावधी सकिएसँगै सोही कार्यालयलाई पो बुझाउने होला त । न कि लाज, सरम र पदीय गरिमाको ख्याल नगरी व्यक्तिगत प्रयोजनका लागि प्रयोग !’ 

अर्का ट्वीटर प्रयोगकर्ताले कार्यकाल सकेर घर फर्किने बेलामा निवर्तमान राष्ट्रपति भण्डारीको आफ्नै कारणले आलोचना भएको टिप्पणी गरेका छन् । ‘जाने बेला बदनाम नगरेको भए हुने, आखिर त्यो राष्ट्रपति कार्यालयको सम्पत्ति हो । व्यक्तिगत होइन । पहिले जे–जे पोष्ट भएका छन्, ती भण्डारीका व्यक्तिगत कुरा होइन, संस्थागत हो । तिनीहरु कि लैजानु पर्यो ? कार्यालय र व्यक्तिका अलग–अलग हुनु पर्यो अब’, उनले लेखेका छन् । 

भण्डारीले भने हिजो रुपान्तरित उक्त ह्यान्डलबाट क्रिकेट खेलाडीलाई बधाई दिनुभएको छ । त्यसमा रिप्लाई गर्दै रामेशले २५ हजार फलोअरको लोभ गरेर भण्डारीले राष्ट्रपति कार्यालयको ह्यान्डल निजी बनाएकोमा कडा व्यङ्ग्य गरेका छन् । ‘क्वार्टर छाड्दा तन्ना र दुध तताउने ताउलोसमेत, लगेर पनि जम्मा २५ हजार फलोअरको लोभ नगरेर त्यो हेन्डल चाहिँ राष्ट्रपतिलाई नै बुझाएको भए बेस हुनेथ्यो’, कटाक्ष गर्दै उनले लेखेका छन्,’ उत्तरोतर प्रगतिको शुभकामना !’