विद्यार्थीको लफडाले बिथोलिएको कमर्स क्याम्पसमा भोलि चुनाव

नेपाल कमर्स क्याम्पसमा भोलि स्ववियु निर्वाचन हुने भएको छ । गत चैत ५ गतेका लागि निर्धारित निर्वाचन बिथोलिएपछि त्रिभुवन विश्वविद्यालयले भोलि चुनाव गराउन लागेको हो ।

भोलि बिहान ८ बजेदेखि दिँउसो ४ बजेसम्म निर्वाचन हुने क्याम्पस प्रमुख प्रा.ध्रुवप्रसाद सिलवालले बताए । निर्वाचनको सम्पूर्ण तयारी पूरा भइसकेको जानकारी दिँदै उनले निर्वाचनलाई शान्तिपूर्वक, भयरहित वातावरणमा सम्पन्न गर्न–गराउनसम्बद्ध प्राध्यापक, कर्मचारी, विद्यार्थी र विभिन्न संघसंगठनसंग सहयोगका लागि आग्रह पनि गरेका छन् । 

क्याम्पसले आज जारी गरेको सूचनामा भनिएको छ,‘स्ववियु निर्वाचन क्याम्पस प्रशासन, निर्वाचन समिति र सम्बद्ध विद्यार्थी संघसंगठनका उम्मेदवारका बीच गरिएको सहमतिबमोजिम मिति २०७९–१२–११ गते शनिबारका दिन बिहान ८ बजेदेखि दिनको ४ बजेसम्म निर्वाचन हुने व्यहोरा सम्बन्धित सबैको जानकारीका लागि यो सूचना प्रकाशित गरिएको छ ।’

नेपाल कमर्स क्याम्पसले उम्मेदवारहरुकोे अन्तिम नामावली प्रकाशन गरिसकेको छ । चुनावका क्रममा त्यहाँ विवाद उत्पन्न भएपछि क्याम्पसले सूचना निकालेर निर्वाचन स्थगित गरेको जानकारी गराएको थियो ।