नेपाल वायुसेवाको सेवाप्रति नयाँ दिल्लीमा यात्रुको आक्रोश, ‘कहिले सुध्रिने ?’

नेपालको एक मात्र राष्ट्रिय ध्वजावाहक विमान सेवाको स्तरबारे फेरि प्रश्न चिन्ह उठ्न  थालेको छ । हिजो अपरान्ह भारतको राजधानी नयाँ दिल्लीबाट उड्नुपर्ने निगमको विमान राति अबेरसम्म उड्ने जानकारी दिएर अन्ततः विना कारण उडान रद्द गराइएपछि यात्रुहरु आक्रोशित बनेको बताइन्छ । दिउँसो ४ बजेर २० मीनेटमा उड्नुपर्ने आरए २१८ नम्बरको उडान मध्यरातमा रद्द भएको हो । उक्त उडानमा भारत राजस्थानका यात्रीहरु धेरै  थिए । उनीहरु नेपालमा तीर्थयात्रा गर्न आउन लागेका हुन् ।

तर,कम्पनीले उडान मध्यरात रद्द गरेपछि उनीहरु बिलखबन्दमा परे । राजस्थान सरकारको खर्चमा नेपाल आउन लागेका उनीहरु बिहान ३ बजे उठेर सडक मार्गबाट नयाँ दिल्लीतिर लागेका थिए । दिउँसो १ बजे नयाँ दिल्ली विमानस्थल पुगे पनि काठमाडौंको उडान रद्द भएपछि ती रुष्ट भए ।

उडान रद्द हुँदा कम्पनीको तर्फबाट कुनै पनि कर्मचारी विमानस्थलमा थिएनन् । यसले पनि यात्रुहरु थप क्रुद्ध बनेको बताइन्छ । सोही उडानमा काठमाडौं आउन लागेका एक जना नेपाली भन्दै थिए, ‘विमानस्थलमा आरएको कुनै नेपाली कर्मचारी देखिएनन् । यो संस्था कहिल्यै सुध्रिने भएन । कर्मचारी नसुध्रिएपछि कम्पनी डुब्ने पक्का छ ।’

पहिले यात्रुहरुलाई दुई घण्टापछि साँझ सवा ६ बजे उडान हुने बताइएको थियो । तर राति १० बजेसम्मको भाका सारेर अन्ततः उडान रद्द भएको घोषणा गरियो । 
आरए २१८ उडान नम्बरको एअर बस ३३० विमानमा दिउँसो नयाँ दिल्ली पुगेपछि प्राविधिक समस्या देखिएको बताइएको छ ।

सोही विमान हिजो राति काठमाडौंबाट ११ बजे कतारको राजधानी दोहातर्फ उड्ने सेड्युल थियो ।